[ 23 ] Hinn þriði áss er sá er kallaðr er ¹ Njörðr, hann býr á himni ² þar sem heitir ³ Nóatún. Hann ræðr fyrir göngu vinds ok stillir sjá ok eld. Á hann skal ⁴ heita til sæfara ok til veiða. Hann er svá auðigr ok fésæll at hann má gefa þeim auð landa eða ⁵ lausafjár er á hann heita til þess ⁶. <Eigi er Njörðr ása ættar.> ⁷ Hann var upp fœddr í Vanaheimum ⁸, en vanir gísluðu hann goðunum ⁹ ok tóku í mót at ása ¹⁰ gísli<n>gu þann er Hœnir heitir. Hann ¹¹ varð at sætt með goðunum ¹² ok vönum ¹³.

Njö<r>ðr á þá konu er Skaði heitir, dóttir Þjaza ¹⁴ jötuns. Skaði vill hafa bústað þann er ¹⁵ átt ¹⁶ hafði faðir hennar, þat er á fjöllum nökkvorum þar sem heitir Þrymheimr ¹⁷, en Njörðr vill vera nær sæ. Þau sættusk á þat at þau skyldu vera níu vetr ¹⁸ í Þrymheimi ¹⁷, en þá aðra níu ¹⁹ at ²⁰ Nóatúnum. En er Njörðr kom aptr til Nóatúna af fjallinu, þá kvað hann þetta: 

35. Leið erumk fjöll,  varka ek lengi <á> 21: nætr einar níu.  Úlfa þytr  mér þótti illr vera  hjá söngvi svana.

Leið ervmc fioll,  varca ec lengi,  nætr einar ix.  vlfa þytr  mer þotti illr vera  hia songvi svana.

Þá kvað Skaði þetta:

36. Sofa ek <ne> máttak 22 sævar beðjum á  fugls jarmi fyrir.  Sá mik vekr  er af víði kemr  morgun 23 hverjan már.

Sofa ek mattac  sæfar beþivm a  fvgls iarmi firir;  sa mic vekr,  er af viþi kemr,  morgvn hverian mar.

Þá fór Skaði upp á fjallit ²⁴ ok bygði í Þrymheimi ²⁵, ok ferr hon mjök á skíðum ok með boga ok skýtr dýr. Hon heitir Öndurguð eða Öndurdís. Svá er sagt: 

37. Þrymheimr 25 heitir er Þjazi bjó 26, sá hinn ámátki 27 jötunn, en nú Skaði byggvir  skír brúðr guða 28 fornar toptir föður.

Þrimheimr heitir,  er Þiazi bio,  sa hinn amatki iotvnn,  en nv Skaþi byggvir,  skír brúðr gvþa  fornar toptir favþvr.

[ 24 ] Njörðr í Nóatúnum gat síðan tvau börn, hét sonr ¹ Freyr en dóttir ² Freyja. Þau váru fögr álitum ok máttug. Freyr er hinn ágætasti af ásum ³. Hann ræðr fyrir regni ok skini ⁴ sólar, ok þar með ⁵ ávexti jarðar, ok á hann er gott at heita til árs ok friðar. Hann ræðr ok ⁶ fésælu manna. En Freyja er ágætust af ásynjum, hon á þann bœ á himni er Fólkvangar heita ⁷, ok hvar sem hon ríðr til vígs, þá á hon hálfan val, en hálfan Óðinn, svá sem hér segir ⁸:

38. Fólkvangr heitir,  en þar Freyja ræðr  sessa kostum í sal 9. Hálfan val  hon kýss á 10 hverjan dag, en hálfan Óðinn á.

Folkvangr heitir,  en þar Fræyia rædr  sessa kostvm isal;  halfan val  hon kys ahverian dag,  en halfan Oþinn a.

Salr hennar, Sessrýmnir ¹¹, hann ¹² er mikill ok fagr. En ¹³ er hon ferr ¹⁴, þá ekr hon köttum ¹⁵ tveim ¹⁶ ok sitr í reið. Hon er nákvæmust mönnum til á at heita ¹⁷, ok af hennar nafni er þat <tignar> ¹⁸ nafn er ríkiskonur eru kallað<a>r fróvur ¹⁹. Henni líkaði vel mansöngr.  Á hana er gott at heita til ásta." 

[ 25 ] Þá mælti Gangleri: "Miklir þykkja mér þessir fyrir sér æsirnir ¹, ok eigi er undarligt at mikill kraptr fylgi yðr, er þér skuluð kunna skyn goðanna ² ok vita hvert biðja skal hverrar bœnarinnar. Eða eru fleiri enn goðin ³?"

Hár segir: "Sá er enn áss er Týr heitir.  Hann er djarfastr ok bezt hugaðr, ok hann ræðr mjök sigri í orrostum. Á hann er gott at heita hreystimönnum.  Þat er orðtak at sá er ⁴ týhraustr, er um fram er aðra menn ⁵ ok ekki sésk fyrir. Hann var ⁶ vitr svá at þat er ⁷ mælt at sá er týspakr ⁸ er vitr ⁹ er. Þat er eitt ¹⁰ mark um djarfleik hans, þá er æsir lokkuðu Fenrisúlf til þess at leggja fjöturinn á hann, Gleipni ¹¹, þá trúði hann þeim eigi at þeir mundu leysa hann, fyrr en ¹² þeir lögðu ¹³ honum at veði hönd Týrs ¹⁴ í munn úlfsins ¹⁵. En þá er æsir vildu eigi leysa hann, þá beit hann höndina af, þar ¹⁶ er nú heitir úlfliðr ¹⁷, ok er hann einhendr ok ekki kallaðr sættir manna. 

[ 26 ] Bragi heitir einn, hann er ágætr at ¹ speki ok mest at ¹ málsnild ok orðfimi. Hann kann mest af skáldskap, ok af honum er bragr kallaðr skáldskapr,  ok af hans nafni er sá kallaðr bragr karla eða kvenna ² er orðsnild hefir framar en aðrir, kona eða karlmaðr ³. Kona hans ⁴ er Iðunn, hon varðveitir í eski sínu epli þau er goðin ⁵ skulu á ⁶ bíta þá er þau eldask, ok verða þá allir ungir, ok svá mun vera allt ⁷ til ragnarøkrs ⁸."

Þá mælti Gangleri: "Allmikit þykki mér goðin ⁵ eiga undir gæzlu eða trúnaði Iðunnar."

Þá mælti Hár ok hló við: "Nær lagði þat ófœru einu sinni ⁹. Kunna mun ek þar af at segja, en þú skalt ¹⁰ nú fyrst heyra nöfn ásanna fleiri ¹¹.

[ 27 ] Heimdallr heitir einn, hann er kallaðr hvíti áss, hann er mikill ok heilagr.  Hann báru at syni meyjar níu ok allar systr. Hann heitir ok Hallinskíði ¹ ok Gullintanni ², tennr ³ hans váru af gulli. Hestr hans heitir Gulltoppr. Hann býr þar er heitir ⁴ Himinbjörg við Bifröst. Hann er vörðr goða ⁵ ok sitr ⁶ þar ⁷ við himins ⁸ enda at ⁹ gæta brúarinnar fyrir bergrisum, þarf hann ¹⁰ minna svefn en fugl. Hann sér jafnt nótt sem dag hundrað rasta frá sér.  Hann heyrir ok þat er gras vex á jörðu eða ¹¹ ull á sauðum ok allt þat er hæra ¹² lætr. Hann hefir lúðr þann er Gjallarhorn heitir, ok heyrir blástr ¹³ hans í alla heima. Heimdalar ¹⁴ sverð er kallat höfuð ¹⁵. Hér er svá sagt ¹⁶:

39. Himinbjörg heita 17, en þar Heimdall 18 kveða valda véum.  Þar vörðr 19 goða 20 drekkr í væru ranni  glaðr hinn 21 góða mjöð.

Himinbjorg heita,  en þar Heimdall  qveþa valda vevm,  þar vavrdr goþa  dreckr iverv ranni  glaðr hinn goþa mioð.

Ok ²² enn segir hann sjálfr í Heimdalargaldri ²³:

40. Níu em ek mœðra 24 mögr, níu em ek systra sonr 25.

Niv em ec mæþra mavgr,  ix. em ec systra sonr.

[ 28 ] Höðr heitir einn ássinn, hann er blindr. Œrit er hann styrkr ¹, en vilja mundu ² goðin ³ at þenna ás þyrfti ⁴ eigi at nefna, þvíat hans handaverk munu lengi vera höfð at minnum með goðum ⁵ ok mönnum. 

[ 29 ] Víðarr heitir einn ¹, hinn þögli áss. Hann hefir ² skó þjökkvan ³. Hann er sterkr næst því sem Þórr er ⁴. Af honum hafa goðin ⁵ mikit traust í allar þrautir. 

[ 30 ] Áli eða Váli heitir einn, sonr Óðins ok Rindar.  Hann er djarfr í orrostum ok mjök happskeytr ¹.

[ 31 ] Ullr ¹ heitir einn, sonr Sifjar, stjúpsonr Þórs ². Hann er bogmaðr ³ svá góðr ok skíðfœrr svá ⁴ at engi má við hann keppask. Hann er ok ⁵ fagr álitum ok hefir hermanns atgervi. Á hann er ok ⁶ gott at heita í einvígi. 

[ 32 ] Forseti heitir sonr Baldrs ok Nönnu Nefsdóttur ¹. Hann á þann sal á himni er Glitnir heitir, en allir er til hans koma með sakarvandræði ², þá fara allir sáttir á braut ³. Sá er dómstaðr beztr ⁴ með guðum ⁵ ok mönnum. Svá segir hér: 

41. Glitnir heitir salr,  hann er gulli studdr  ok silfri þakðr it sama,  en þar 6 Forseti 7 byggvir flestan 8 dag ok svæfir allar sakar 9.

Glitnir heitir salr,  hann er gvlli stvddr  ok silfri þaktr it sama,  en þat Forsæti  byggvir flestvm dag  ok svæfir allar sakar.