Félag samkynhneigðra stúdenta stofnað

Félags samkynhneigðra stúdenta í Háskóla Íslands var stofnað þann 19. janúar og fór stofnfundurinn fram í stofu V-158 í VR-II. Af því tilefni stóðu Jafnréttisráð SHÍ og hið nýja félag saman að „Hinsegin dögum" dagana 20.-22. janúar. Félaginu er ætlað að vera vettvangur fyrir réttindabaráttu, fræðslu og félagslíf samkynhneygðra í Háskólasamfélaginu. Formaður félagsins segir Háskólasamfélagið vera fremur fordómalítið í garð samkynhneygðra en segir þó talsverða vinnu eftir við uppfræðslu því enn gæti leiðitamra gamalla klisja í hugmyndum fólks um samkynhneigða.

Í viðtali við Fréttabréfið segir formaður félagsins Alfreð Hauksson um kveikjuna að stofnun Félags samkynhneigðra stúdenta: „Upphafið var í raun sýning Felix Bergssonar í Íslensku óperunni „Hinn fullkomni jafningi" en unnusti hans Baldur Þórhallsson kennir við stjórnmálafræðiskor. Samkynhneigðir innan Háskólans settu sig í samband við hann og upp úr því var ákveðið að hittast á fundum til að ræða málefni samkynhneigðra. Yfir 20 stúdentar mættu á fundina þrátt fyrir að ekkert hafi verið auglýst. Á fundunum varð til hugmyndin um að stofna hagsmunasamtök og stuðningshóp samkynhneigðra við Háskólann."

Aðspurður um það hvort aðstæður samkynhneigðra í Háskóla Íslands séu á einhvern hátt frábrugðnar því sem þekkist annarstaðar í þjóðfélaginu segir Alfreð: „Nei, í rauninni ekki en það eru viss atriði sem félagið vill vekja máls á eins og t.d. það að þunglyndi sem oft fylgir því að „koma út úr skápnum" getur skýrt brotfall ákveðins hluta nemenda úr námi því algengt er að fólk viðurkenni kynhneigð sína fyrst á háskólaárunum." Félag samkynhneigðra stúdenta getur aðstoðað þennan hóp nemenda og einnig er mikilvægt að starfsmenn Námsráðgjafar Háskólans séu meðvitaðir um þau vandamál sem þessi hópur á við að stríða og geti þá vísað á félagið til ráðgjafar."

Samkvæmt rannsóknum má gera ráð fyrir að innan Hí séu um 200-600 samkynhneigðir stúdentar. Félagið er opið öllum sem láta sig málefni samkynhneigðra varða jafnt samkynhneigða og tvíkynhneigða sem þá sem óöruggir eru með kynhneigð sína.